Arizko Dorretxeak "Ertibil Bizkaia 2026" erakusketa hartuko du
Azaroaren 6tik 25era.
Arizko Dorretxeko erakusketa-aretoak Ertibil Bizkaia 2026 hartuko du azaroaren 6tik 25era. Bizkaiko Foru Aldundiak antolatutako arte bisualen erakusketa ibiltari horren helburua da lurraldean beren sormen-jarduera garatzen duten artista hasiberrien lana babestea eta ezagutaraztea.
44. edizio honetan, Ertibilek 18 artistaren lanak biltzen ditu, arte garaikidearen sorkuntzaren askotariko ikuspegia eskaintzen dutenak. Erakusketak hainbat proposamen eta hizkuntza artistiko ezagutzeko aukera ematen du, eta, aldi berean, sortzaileen belaunaldi berrien lana herritarrengana hurbiltzen du.
2026ko edizioak Bilboko Rekalde Aretoan hasi zuen bere ibilbidea, eta, Barakaldotik igaro ondoren, Basaurira iritsiko da. Bertan, azaroaren 25era arte egongo da gurean, eta, ondoren, Igorrera joango da, ibilbidearen azken geltokira.
Erakusketaren jarduera osagarri gisa, azaroaren 13an (ostirala) 18:00etan, bisita gidatua egongo da Arizko Dorretxean. Bertan, hurbiltzen direnek aukera izango dute ikusgai dauden lanak sakonago ezagutzeko eta Ertibil Bizkaiaren aurtengo edizioan parte hartzen duten artisten proposamenetara hurbiltzeko.
